Hih Theih ding ki lawm veh aw guai te na sim loh uh phamawh dan hi ei guai te ....
http://www.zokhup.com/2011/06/zia-wzc-le-zomi-kipawlna-tuamtuam.html ZIA, WZC le Zomi kipawlna tuamtuam
Zomi sungah khanlawhna tuamtuam abanban in hong tunga, nitumna lam pan khalam khanlawhna hong tu'n zawh kum 100 aci'n ciang in, Zomi sung zong thu le la ah hong malh pian ta a hihi.
Tua tawh kitonin Zomi sungah Zomi le Zogam makhualna in, kipawlna tuamtuam phulum phul in hong phulkhia panpan ta hi.
Hi banga kieukim pan khangto lam i manawh ciangin, hunlui lai zia le tongte in hong patau sak in, mi tampi kilungmang cih iza imu ciat ahihi.
Zomi disscussion forum tuamtuam ah mitampi lungnawi in, kiselbuai phialphial ahihmanin WZC EC meeting in zong nungkal sung in gen khawmna nei in, tua pan in hibang thute tawh kisai hilhcianna (Clarification) bawl ding in vaipuak hong pia ahihmanin, makaite le mipi zahtakna in i dinmun tawh kisai press statement ahilo article le dotna dawngna daan in i taklang ding ahihi.
Tulai Zomi kipawlna om khenkhang tawh kisai mi tampite lungmangna le dotna tam penpen te Frequently Asked Questions-FAQs daan in anuai ah thukuang i lui hi.
1. Zomi kipawlna i bawlbawl pen tamlua ta hilo hiam?
Hih tawh kisai pen Zomi te lungmangna pi khat hi in, kuamah zong mawhsak huailo ahihi.Zomi kipawlna tuamtuam pen tawm lawlai hizaw ahihi. Leitung ah mipi vaihawmna gamte ah mipi thuneihna akip nang in institution ci in, kipawlna tuamtuam kisam ahihi. Khangno kipawlna, numei kipawlna, upa (seniors) kipawlna, siamna khatpeuh siksan kipawlna a kipan kipawlna tuamtuamte huamkha ahihi. Tua institutionte pen gam khat le minam khat detdo nanga kisam vive ahihi. Democracy khuambul te ahihi. Thuneihna pen mun khat a isu'n khop sang in, mun tuamtuam ah theh leng, mipi a dingin lauhuailo zaw in, tawldam huai zaw ahihi. Mun khat ah abuuk abek a i su'n khawm ciangin, athuaklah pen ei mipite mah kihi kik leuleu ahihi. Tua ahihmanin Minam gina khat le khawmu khat i hih le, institution kisam bangbang i bawl loh phamawh hong suak ahihi.
2. ZNC role pen bang hiam ?
ZNC pen political party khat hi in, Zomi min tawh kibawl political party lak ah mipi mandate taktak atawi party khat ahihi. 1990 kum ah mipi palai-MP nih telcing ahihi. 1990 kum kiteel zawh in Myanmar Army in thuneihna pia hileh Parliament ah tu ding uh ahihi. ZNC tup le ngim pen election siksan a Zomi maban vai geel ding cih ahihtawh kiton a, parliament innpi siksan a Zomi te deih le kisam te , hong van ding uh ahihi. Ahizong in Myanmar Army in thuneihna pialo banah, thukhunpi pen 1990 mipi palaite gelh ding kimlai Myanmarian Army in palai kineih teng hong gelhsak ciang in, leitung bup kipawlna UNO i Universal Declaration of Human Rights le International Law tawh kituaklo ahihmanin, ZNC in 2008 thukhunpi kici pen pomlo a nuaksan ahihi.
Tua ahihman a 2010 kiteelna zong lutlo ahihi. 1990 kum kiteelna zawhciang Myanmar Army thuneihna piakhia hile bel ZNC pen Zomi sunga political party khat hong hi lel ding ahihi. Ahizong in Panglong thuciam tawh kituak thukhunpi gelh ding atangtu'n mateng Myanmarian Galkapte gawtna nuai ah thuman thudik le, mipi deihna din pih kinken uh ahih banah, tua banga panlakna pen mipi le leritung in kitheihmawh bawl san ngamlo, theih pih denden uh amanin, ZNC pen political party bek hong hinawnlo in, gamsung a political means tawh i ngimnate tangtung nang a asem, kipawlna poimawh le nunghei san theih loh party khat hong suak ahihi.Gamsung ah Zomi te deihna ZNC zah a tatsatlo a panla pawl dang omnailo ahihmanin, ZNC pen i political party poimawh penpen khat hi ta dih phot ahihi. Election le parliament siksan a mapang uh ahihmanin i Non Violence Political party neih sun ahihi. Mizoram bang hi le MNF, MPC le ZNP te bangbang ahihi. Thudang tawh mekmat ding hilo cih i theih ding kisam hi.
2. ZCO role in bang hiam?
ZCO lah kici LZI lah kici kipawlna i neih pen, kuakua in bang teng gen ta leh aleikiat (by nature) in Civil Society ahihi. Civil Society i cih pen nam tampi bel om sam in, tua lak ah ZCO pen Zomi Community Organisation i cih tak mah lian in, community organisation ahihi.
Zomite hamsatna le khantoh nang in, hun sawt lua nailo khat a kipanin, i gam i lei pan kikuankhia a, leitungah i kikhung ahihi.Tua bang leitung mun tuamtuam i zuan cil in lungleng le kingaina hang in, biakpiakna khong kibawlkhawm leihleih in i ki huai khawm ngeingai ahihi. Amasa in Christian Fellowship le Innkuan khong kici tawm ziau in, Kawlgalkapte huat ding alau kitamlai ahihmanin, mite hong kihel ngam nang le Kawlmang muhkhialloh nang in, biakna le social vai bek mah tawh mipi na ki paipih ahihi.
Mihing pen khat le khat ngaihsun le muhdaan kibanglo le Zomite akuakua kingai tek in, i mangthang loh nang kihuai kul ahihmanin, Zomi innkuan pen ikisam mahmah institution khat ahihi. Mi tuamtuam in a ma up daan a politics ahizong bangbang sai in, political organisation khat peuh ah zong kihel thei hi. Ahizong in Zomi himawk ahihciang a, Zomi Innkuan sunga kihel veve mah ahihi. Tua mah bang in mi khatpeuh Muslim abia a, Hindu asuak zong in Zomi ahihna asisan kikhel tuan hilo ahihmanin, Zomi Innkuan sung mah a om hi veve ahihi. Gentehna in Zomi Innkuan bang in i vek in Communist suak ni, i vek in Fascism pom ni,sumhau uh ahihciangin Muslim lutni ci theilo ahihi. Khat le nih in bel pawlsungah zuak thei in, pawlmi te'n aduh kei le va thal tulh theih omlo ahihi. Community organisation ahih tawh kiton a community i welfare, khantoh nang, ngeina le lai, nopni dahni cih bang vaite ah mipi buksan theilo uh ahihi.
Cihnopna ah Zomi Innkuan pen Zomi bup khawmu tawh khawmulo tawh, apil tawh ahai tawh, azawng tawh ahau tawh khentuam omlo a i neih khawm i social institution pi khat hong hiphot ahihi. Manipur a Zomi Council banga i neih kipawlna poimawh mahmah khat ahihi. Zomite siatni phatni a i koh ding i kipawlna ahihi. Political party khatpeuh hiam, biakna khatpeuh hiam ahih kei le, adang group khatpeuh or mimal khat i zawltaipih (elope) hiam hijack theih hi zenzen lo ahihi. Tulai a makai te'n zong tua mah mu a mipi hong paipih uh ahihi. Khen Khat in Pu Chin Do Kham makaih ZCO peuhmah in Politic sailo ding ci, cin lungkia uh hi. Tuabanga lungkiat ding hihetlo ahihi. ZCO pen Civil Society ahihlam Dr. Thuap 3 angah Pu Do Kham in telcian lua ahihman a, tua banga hong kalsuan pih hizaw ahihi.Politic pen asemsa om banah tulai zong asemsem om cih ZCO president in haihlo cih ding ahihi.
3. GZA role in banghiam?
GZA pen nungdeuh a kipan hong kiphuankhia hi in, i theihsa tek mah bangin biakna makai izakzak ngeite i makaihna ahihi. GZA pen Kawlgam sunga i neih sunsun kipawlna khat hong suak ahihi. Kawlgam sungah Zomi te'n institution limlim khat zong kineilo cileng kikhiallo ding ahihi. Zomi te khanlawh nang kipawlna khatpeuh bawl leng Kawlmang in hong haza lua mahmah in, asiat nang bekbek hong vaihawm den ahihmanin, Zomi te zaipi tak a huam Zomi bup huam kipawlna a om zawh loh sawt mahmah ahihi.
GZA pen makai te'n press conference a agen mah bang un, grassroot level a kiphutkhia ding cih na hipah lo a, Zomi kipawlna tuamtuam, mipi le vaituamtuam ah ngaihsun piakna le bawllem dinga kiphuan ahihi. Naga te in Naga Hoho cih institution pi khat aneih daan uh tawh kibang ahihi. Naga te'n nambup gelkhawm khensat khawm ding aneih uh ciang in Naga Hoho kici kipawlna pen nak zat mahmah uh ahihi. Tua mah bangin Zomi sungah GZA in tua bang role hong nei le, kimunbui mahmah kha thei ding ahihi. Ahizong Zomi Interest tawh kituaklo mimal, kipawlna, kumpi khatpeuh gum dinga mipi hong talkaih sawm uh le bel, sialpaih hong kul pelmawh ding ahihi.
3. WZC role in bang hiam?
WZC pen tup le ngim a kitaklang bangmah lian a, Zomi suahtakna le mipi vaihawmna deih, gamsung gampua koimun koi khua a om cih khentuam omlo a, i kihuaina lawmpi ahihi. WZC pen adiak in mimal ngaihsunna le khensatna siksan a kibawl ahihi. Kipawlna tuamtuam tawh zong a khilkhil in kikhaikhawm theih dinga thukhunpi kigelh ahihi. Ahizong in mimal le kipawlna lutnuam te'n WZC tup le ngim, sem ding a kibawl policy le programme te, apom theih kul ahihi.
Masuan kician nei mellopi a kipawl pong cih bang om theilo in, member khat in vaipuak le piakhiatna aneih kul ahihi. WZC ah kihel a active lo member khatpeuh a om leh kitawpsak pahpah ahihi. Cihnopna ah Zomi ahihnak le huam cih bang hi pahlo in, tup le ngim kibang mimal le kipawlnate kilawmkhawmna Umbrella Organisation khat ahi, cihnopna hi zaw hi.
Adiak in Kawlmang tawh semkhawm, pangkhawm le amizatte WZC ah kisanglo ahihi. Tua ahihmanin WZC pen Suahtakna, kitualvaihawmna le mihing tanvo, donghu le Zomite annkhingkham nanga kibawl Zomi pawlpi ahihi.
WZC bel Zomi kipawlna ineih sunsun le mimal kici khempeuh mite hehpihna le panpihna bek tawh i hi'n keei zawzen pen, hun hong sawt ciang hoih den hetlo lo ding ahihmanin, ci in hamsa tale ei le ei khua-ul,khuak le thatang tawh a ding tentan kipawlna i neihsun ahihmanin, policy le program ah zong minam dang le gam dang te'n influence hamsa in, Zomi Interest vive ah thu kikhensat mengmeng thei kipawlna i neih sunsun khat ahihi.
WZC member khempeuh pen Zomi vive ahihmanun ZCO/LZI member higai uh ahihi. Tuamah bang in GZA pen Zomi bup huam a kiphuan ahi ci in, a committe in ki claim uh ahihmanin, GZA makaite zong WZC member khempeuh i makai nam khat zong hipah uh ahihi.
Ahizong in GZA le ZCO member khempeuh automatic a WZC member hi theilo kieukiau zel ahihi. WZC pen anai pen in genleng WZO, WUFI, NCUB le TCHRD te tawh kinaihuai ahihi. Gam khat le minam khat movement pen kibang linlian cihbang koimah ah om theilo ahihmanin, hihpawlte tawh Carbon Paper banglian bel hituan samlo leuleu themthum ahihi.
4. ZRO role bang hiam?
ZRO pen Zomi buppi kigawmkhawm kik nanga kibawl hi in, Zomi te kitualvaihawmna hong pompih nak uh le, Burma, India tawh ahizong kipawlkhawm ding cih ahihi. Tuamah siksan in asim amal azo cih omlo in na kisemkhawm ahihi. Ahizong in thakhat thu a kigawmkhawm ding pen, hong baih paklo ahihmanin anip penna mun ahi Manipur State sung mah ah Zomi gamke beuno khat eukhia masa ding hihang ci in, Zogam kimalep ahihi.
Zomi Council siksan in Union Government of India ah Memorandum a kipiak laitak ahihi. Zomi Council min tawh MoU akikhiat hangin, ZRO pen amung pi ahihlam mi khempeuh i theih thusel (open secret) ahihi. Tua MoU ah Autonomous Tribal State-ATS kici khat Manipur sung mah ah bawlkhiat ding in kitaklang ahihi. Assam State nuai a Karbi Anglong State bangbang kideih ahihi.
India le Manipur sungah ATS kingen hita dih phot ahihmanin, Burma le Bangladesh pen ZRO/ZRA a ding in "Area of Concern" hibek in " Area of Operation" hi tadihlo phot ahihi. Tua pen i theihcian mahmah kei le, kiphunphun kha thei ahihi.
ATS Demand pen tu le tu dinmun ah Zomite a dingin a practical penpen in ZRO in mu ahihmanin, mipi in i panpih ding hilel hi. Zomi te'n inngua hah ding 3 kinei hi.
Manipur Zomi te'n ATS hong ngah le uh Mizoram tawh genkhawmleng, India Zomite dinmun hoihgawp ta cih ding ahihi. ATS pen zing le thai a kingah pah ding hilo in, kum 10 bang sawt thei lai ahihi. Inngua 3 lak ah India lam pen hoihlam manawh in Burma le Bangladesh pen lungkhamhuai simsimj ahihi. Bangladesh pen democracy gam hi ta in, phadawm in, Burma nuai a Zomite dinmun pen mulkimhuai mahmah ahihi.
ZRO le ATS pen Zomi te Grand Strategy sunga kahiangno khat cileng kikhiallo ding ahihi. ZRO/ZRA memberte ATS ngahkhin ciangin, atangzai zaw a semnuamlai a om le, atawntunga kongkhak hongsa in kimuak ahihi. ATS ngahma in zong ZRO/ZRA le Manipur Zomite amau tha bek tawh panga, thuakzawhloh ding gal le sa ahizong in, kial le tak ahizong in hamsa khat peuh a om le, Zomi bup nidang sang ahatzaw a i pangkhawm ding hi veve ahihi.
5. Zomi Independence Army banghiam?
Zomi Independence Army pen athak hilo in sawtpek a kipan a omsa ahihi. Zomi tampite pen suahtakna le mipi vaihawmna deih in Kachin, Shan, Karen le Wa a kipan revolutionary pawl tuamtuam ah tampi na ki om ahihi. Tua bek thamlo in gamsun mahmah ah zong leinuai pan nasem tampi na om ahihi. Tua bek thamlo in Zosuan sung kipawlnate ah zong tampi ki om ahihi. Asi aliam le apoilawh zong om ahihi.
Ahizong in tua bang tengteng pen sih le liam atuak uh hangin Zomi in credit kingah pihlo ahihi. Cihnopna ah Zomi mindawk tuanlo ahihi. Tuabanga tang khawtawn pan ana omsa teng pen, hibanga mi a ding sembanga na om uh sang in, Zomi Cause mah buai pih unla, Zomi mah siatpih phatpih le uh cin ci in, WZC in suggestion akipiak le hong pom thei bilbel uh a, bang min tawh kikhaikhawm ding cih hong kumpih uh ciang, Federal, Democracy le Human rights cih khong bel i tup mah hi in, ahizong in mipi te'n tuabangte tel bialbual selo in "Independence" cisuk leng mipite tuii zaw uh hi, kici hi. Zomi i hih ciangin Zomi kihel henla, akapkap khin i hih teh Army zong behlap in "Zomi Independence Army"ci mai vevua, akicih leh hong kikum uh a, hoih sa pah ahihman un , ZIA kici ding uh ahihi.
Tua ahaihmanin ZIA cih pen pawl thak le mi thak kiphuantawm dihdih ding hilo a, adodo asemsem sa teng in dialap le badge khat, min khat pua khawm ding cihna hizaw ahihi. Azakhanailo pawltuamtuam a omlaite zong kizasak dinga ZIA badge thuahtek ding cih ahihi. Mun khat a kikaikhawm ding cih pahna hilo in, i semna tek Zomi le Zogam credit tangsak ding cihna hizaw ahihi.
6. WZC in ZIA phuan hiam?
WZC in ZIA phuankhia zenzen lo ahihi. Gam le nam a ding a si ngam le thuakngam ding galkap pawl cih khong pen, mi khat or pawl khat peuh i phuankhiat sak ziau theih hilo ahihi. Asem abawl dingte in amau lungsim kizo a hong dingkhiat bek ciang vua apiang thei pan thu ahihi. Leitung tangthu ah zong tua mah ahihi. WZC in amaute kipiakhiatnate midang pawldang te'n ahamphat pih sangun, Zomi le Zogam mah in credit tang le hoih ding hi, cih deihsakna tawh suggestion khat le nih kipia hi bek lel ahihi. Tua ahihmanin WZC in ZIA phuan ta dihdih lo a, ZIA in ZIA aphuankhia hizaw ahihi. Adik zaw lai in genleng Myanmarian suppression/Kawlte huaisiatna in Zomi resistance/Zomite kidalkikna piangkhia sak cileng dik zaw kanlai hi. ZIA te i pahtawi ahihi.
6. WZC in ZIA apanpih diam?
WZC in Zomi le Zogam a ding si ngam ci thadah asemngam ciang zong kipakta mahmah ahihi. Neilo pipi mah in dekkhuat talkhuat zen in, mukhat pekhat tawh kihuh zel ahihi.
A si ngam le asem ngam gentak loh pawisim a motor tuahsiate nangawn kilainat pih mahmah ahihi.
Tuabang ahihmanin Khual-ul sisan le luangkham liang a suahtak nang asemsem ngei, asemlai le asem zom lai dingte pen, mite'n hong simmawh le neumuh sak ding kiphal lo ahihi. Zomi numeite abuanbuan le Zomi bup hong deksidawn Kawlgalkapte nangawn, bangmah kilawhzolo ahihciangin, semkhialh anei phial uh zong in ZIA vahuat tuannang kimulo ahihi.
Huathuai kisalo ahihi.
Ahih theih le ZIA te iit kisin sawm zaw cih ding ahihi. ZIA galkap khat bang Shan gam ah Kawl galkapte akaplum khit ciangin, thau nih laksak in SSA a lut ahihi. SSA in koi ah pai nuam na hiam? ci a dot ciang un ka Zomi pihte mah tawh semnuam ing ci ahihmanin, SSA mahmah in kha uh a , ZIA dingte kiangah apuakngiat uh kici hi. Tuabangmah in ZIA dangte zong asemsa tangthu nei vive kici hi.
7. ZIA Zomi te'n i panpih ding hiam?
ZIA panpihlo in na pakik le na makpa Zo aktui piaksawm na hiam? ci in ki lehdong huai zaw ahihi. Tulai in inngua hahlo gamgua hah , cih paunak laang mahmah cih ih theih hiven. Karen, Shan, Kachin, Burmese, Mon le minam dang khempeuh in KIA, MNLA, KNLA, ABSDF le SSA cih bang amau kisai pih pawl tek huh ding in, leitungbup ah khensat khinzo uh ahihi. Arab suahtakna deih te'n zong campaign ziahziah ta uh hi. Libya te bang Zomi te'n entehhuai ahihi.Chin min tawh sem Zomi party CNF/CNA makai te'n zong sum kaikhawm in ciahpih lenlen khin ta uh hi.
8. ZIA panpih leng alauhuai ding hiam?
Lauhuai peuh mah lo hi. Mon le Kachin galkap General nih zong nunglam deuh in Washington DC hawh in kumpi tawh kimu uh hi. Bang genkhawm uh hiam cih bel kitheilo hi. Kokhua Akron, Ohio zong hong bang uh kici hi.Tua bek thamlo in ABSDF/Student Army kici kawl sangnaupang pawl zong USA le gamtampi ah terrorist list pan kiphiatta hi. Nungdeuh in ABSDF Chairman Thanke zong ko vengkuam teng ah hong pai leplap hi.
New York Khawpi siksan in, Moe Thee tepawl in ABSDF le DKBA a ding sum khon ziahziah ta uh hi. KNU makai lui Mann Robert Zan bang in North Carolina pan Kawlgalkapte tawh akikap ngeina teng uh lai gelh kik ziahziah lel hi. Mite tua bang ahihi. KNU makaipi lui Bo Mya tapa Col. Neder Mya bang in khatvei Norway ah khawmpi khat ah " Kei Karen galkap Col. Nerder Mya hi ing, ci in mipi mai ah kipulak hih tuak hi.Zomi maban hong dal den, Myanmar Army le USDP in zong asem ding uh sem ding uh a, enzong tua hong dalna i phutkham sawm dendin hilel ahihi. Leitungbup ah kidona kizel ta hilel hi.
I panpih nuam le hamsa lo ahihi. A lampi om ahihi. Abeisa hun a thautawite huh leng alauhuaina pen miginalo, sumduh bek le gamdang painuam bek a revolution sunglut khenkhat in, gamdang atung uh cianga, gam le nam nasem te ahekhek man uh ahihi. Leitung khawhun zui a NGO tawh kivak sawm a khenkhat hang ahihi. Tuateng pen Kawlgalkap thukan le a mizatte in namgimtui abuak beh uh cianga, hong nongkai pak hi lel ahihi.
Tuhun ciangin revolution sunga lungsim citak taktak tampite, leitung mun tuamtuam ah kizel ta ahihmanin, kibumleh kawikawi in, tua bang mite damdam in hong daidai ta ahihi. Chance a om ciang tua bangmite kidawmlo kikhoih giapgiap kik ta ahihmanin, nidang bangnawnlo in zawm pianpian ta uh ahihi.
Tua ahihmanin "Athei uh hang phamawhlo, amuh bel musakkha sam ken" cih paunak om mah bang in panlak theih hilel ahihi.
No comments:
Post a Comment